Kevadtormi luuletus. Autoriks Olavi Ruitlane.
kapral uma käega põõsan puhtas ihos torro
oppust alustaden tulõ õhku laske pauk
kapral tollõn ammõtin om osavamb kui Zorro
perän lasku taivale jääs nätä õhuauk
perän pauku veebel joba ütles mis mi teemi
kas meil tulõ võidelda vai tule anda alla
meil ei ole arsenalin täämbädses purgeeni
vastase mi taktikaga saami kõtust valla
kapral laskse müüdä nüüd om külasannast pilpa
peremiis jäi lavale ja vaht ku lammas vihta
õkvalt Zorro staapi ette kandma silkas
samagonni vabrikule saimiki vist pihta
nüüd om käsklus olla Esämaale ustav
seersant lugõ kännu otsan ette manuaali
kuidasmuudu Karlis nimetatu Gustav
lupa mõtsu ümbreringi lagendikes maali
vastasit ku lehmi karamaal saa nüstüs
haina asõmel söögu las granaati
takistusi ületami pikali ja püstü
silmahamba lõikase ku näpits okastraati
tormami ja joosemi ja eläden ei väsü
tiiämi mis tetä mi ei koperda ei kombi
täüdämi ka targa veebli mõnõ ulli käsü
kuis kül paila pääle sai sääne jälle sombi
kevväi omgi tormamises tiiät toda Zorro
Don Diego Vega – ärä unetagu tuud
sõamiis ei näpi perän kevadtormi torro
ja ta söänt pututas vaid armastadu pruut